Hjónin Viðar Guðmundsson og Barbara Guðbjartsdóttir búa í Miðhúsum í Kollafirði með margt fé, nokkra nautgripi, hænur, hunda og ketti. Bæði stunda þau fulla vinnu utan búsins, Barbara vinnur í Grunnskóla Hólmavíkur en Viðar stjórnar kórum norðan og sunnan heiða. Kristín Einarsdóttir hitti Viðar í fjárhúsunum í Miðhúsum og fékk hann til að segja frá tónlistarnáminu og kórastarfinu. 16. janúar 2020
Eitt þeirra fjölmörgu starfa sem unnin eru í sveitum landsins er að rýja féð – sem áður fyrr var gert á vorin áður en rekið var á fjall. Nú er féð rúið tvisvar á ári – seint á haustin og aftur snemma á vorin. Kristín Einarsdóttir fór í lok nóvember og hitti rúningsmennina Ragnar Bragason á Heydalsá og Reyni í Gröf þar sem þeir kepptust við að rýja fé Haraldar bónda a Stakkanesi.6.desember 2020
Jón Stefánsson er fæddur rétt fyrir miðja síðustu öld og hefur alið nær allan sinn aldur á fæðingarbæ sínum Broddanesi við Kollafjörð. Kristín Einarsdóttir heimsótti Jón að Broddanesi og fékk að heyra ýmislegt um búskaparhætti fyrr og nú. 17. desember 2019
Einhverjum gæti dottið í hug að það að vera alin upp úti á landi, ganga í fámennan skóla og hafa fábreytt tækfæri til ýmiskonar tómstunda geti komið niður á ungmennum sem búa við slíkt. Það er allavega ekki raunin með hina átján ára Báru Örk Melsted sem var alla sína grunnskólagöngu í fámennum skóla en hefur nú átján ára lokið stúdentsprófi og stefnir hátt í lífinu og hefur miklar hugsjónir Kristín Einarsdóttir, okkar kona á Ströndum, talaði við Báru í þættinum í dag. 10. desember 2019
Á dögunum var opnuð nýstárleg sýning í húsi galdrasetursins á Hólmavík, þar var meðal annars sýndur nýr galdrastafur sem hjálpað getur eiganda sínum til betri árangurs í fótbolta, annar sem eykur frægð og frama svo fátt eitt sé nefnt. Þessi sýning var afraksturs verkefnis um þjóðtrú sem unnið var í samvinnu Galdrasetursins, grunnskólanna og þjóðfræðistofu. Kristín Einarsdóttir fór á opnun sýningarinnar og tók fólk tali. 3. desember 2019
Á bókmenntahátíðinni „Hin saklausa skemmtun“ sem haldin var á Hótel Laugarhóli í haust sagði Magnús Rafnsson sagnfræðingur frá lestrarfélögum fyrri tíma og Bergsveinn Birgisson las kafla úr bók sinni Landslag er aldrei asnalegt en kaflinn fjallar um lestrarfélagshús. Kristín Einarsdóttir hitti Magnús Rafnsson og ræddi við hann um lestrarfélögin og að því loknu heyrum við Bergsvein lesa á hátíðinni sjálfri. 26. nóvember 2019
Störf dýralækna eru mjög umfangsmikil og í mörg horn að líta og Kristín Einarsdóttir fékk á dögunum dýralækninn sem sinnir norðvesturumdæmi, Gísla Sverri Halldórsson, í heimsókn til sín í Hveravík og ræddi við hann meðal annars um starf dýralæknisins, mikilvægi sóttvarna og ýmislegt annað. 19. nóvember
Guðrún Anna Gunnarsdóttir er fædd og uppalin á Eyri við Ingólfsfjörð við aðstæður sem flestum þykja líklega framandi í dag -t.d. hafði vetrarófærð mikil áhrif á líf fólks, ferðir til og frá skóla gátu verið
sögulegar o.s.frv. Kristín Einarsdóttir hitti Bibbu á æskuheimili hennar á Eyri við Ingólfsfjörð og fékk að heyra brot af endurminningum hennar. 13. nóvember
Haustið 2019 komu út tvær bækur hjá Hinu íslenska bókmenntafélagi, þær heita Send í sveit, þetta var í þjóðarsálinni og Send í sveit, súrt, saltað og heimabakað. Eins og nöfn bókanna gefa til kynna fjalla þær um sama efni en með ólíkum hætti. Hér er á ferðinni afurð stórrar rannsóknar á siðnum að senda börn í sveit og fór hluti rannsóknarinnar fram á Ströndum. Ritstjórar bókanna hjónin Jónína Einarsdóttir og Geir Gunnlaugsson komu á Strandir til að kynna efni bókanna og Kristín Einarsdóttir settist niður með Jónínu og ræddi við hana um rannsóknina og bækurnar
Umhverfislestin hafði viðkomu á Hólmavík laugardaginn 26. okt. 2019. Umhverfislestin er farandsýning á vegum Vestfjarðarstofu þar sem fjallað er um umhverfismál heimilanna á fjölbreyttan, fræðandi og skemmtilegan hátt Kristín Einarsdóttir lagði leið sina til Hólmavíkur og talaði við gesti og gestgjafa á sýningunni. 29. október 2019
