Frá árinu 2016 hefur Kristín Einarsdóttir þjóðfræðingur haft umsjón með útvarpsþáttum eða réttara sagt innslögum í Mannlega þáttinn á Rás 1.
Í þessum stuttu innslögum hefur hún tekið hátt á annað hundrað viðtöl við Strandamenn um ýmis efni, allt frá vangaveltum um kynlíf bænda fyrr á öldum, hestamennsku, hundatamningu, músahræðslu og fleira og fleira.
Hér er þessum innslögum safnað saman og hægt er að leita í þeim eftir nafni og umræðuefnum.
Stóra upplestrarkeppnin fór fram á Ströndum, eins og annars staðar á landinu, og var haldin á Hótel Laugarhóli í Bjarnarfirði. Kristín Einarsdóttir fór á keppnina og ræddi við Aðalbjörgu Óskarsdóttur kennara, Þórð Helgason fulltrúa Radda og sigurvegara keppninnar Kristjönu Kríu Lovísu Bjarnadóttur sem las sigurljóðið Veislu eftir Gerði Kristnýju.
Grettir Ásmundsson tók nýlega við stöðu byggingafulltrúa fimm sveitarfélaga á Ströndum og nágrannabyggðum. Kristín Einarsdóttir hitti Gretti og ræddi við hann um ýmislegt sem viðkemur starfinu.
Kristín Einarsdóttir talaði við Mörtu Guðrúnu Jóhannesdóttur sem á sér þann draum að gera Kaldrananeshrepp ætan og segir í því tilliti að t.d. sé upplagt að borða stjúpur.
Á stríðsárunum voru reistir hér á landi þúsundir bragga sem eftir stríð fengu hin ýmsu hlutverk. Einn slíkur braggi er á Hólmavík og hann gegndi hlutverki samkomuhúss og gerir enn þó að á Hólmavík hafi nú risið annað og stærra félagsheimili. Bára Karlsdóttir er annar eigandi braggans í dag og Kristín Einarsdóttir hitti Báru ásamt Gunnari Jóhannssyni, en bæði eiga þau miklar minningar tengdar þessu merkilega húsi
Halldór Logi Friðgeirsson hefur stundað sjóinn og ýmiskonar veiðiskap frá unga aldri. Hann er núna skipstjóri á Grímsey ST2 og Kristín Einarsdóttir fór um borð og ræddi við hann um sjómennsku og annan veiðiskap.
Guðný Rúnarsdóttir tók við stöðu skólastjóra við Grunnskóla Drangsness síðastliðið haust. Kristín Einarsdóttir hitti Guðnýju og ræddi við hana um skólann, samfélagið á Ströndum og ýmislegt annað.
Á Drangsnesi er rekið hótelið Malarhorn sem dregur nafn sitt af því að skessa nokkur hjó í reiðikasti stórt stykki úr landinu, þar sem nú heitir Malarhorn, kastaði því í sjóinn fyrir utan Drangsnes og skapaði með því Grímsey sem er að margra mati ein helsta perla Stranda. Hjónin Eva Katrín Reynisdóttir og Magnús Ölver Ásbjörnsson reka hótelið og Kristín Einarsdóttir ræddi við þau um reksturinn á tímum Covid og ýmsilegt annað.
Jenný Jensdóttir var eitt þeirra barna sem fékk að fara í sveit sem barn, ein sveitadvölin var þó eftirminnilegri en aðrar þar sem Jenný fór á annan bæ en í upphafi stóð til. Kristín Einarsdóttir hitti Jenny sem nú hefur nýlokið langri starfsævi fyrir Kaldrananeshrepp.
Hreindýrin eru hans eins og sauðféð er bóndans á Íslandi er sagt um Stefán Hrafn Magnússon hreindýrabónda á Grænlandi. Stefán kom í heimsókn á Strandir fyrir stuttu og Kristín Einarsdóttir ræddi við hann um ástæður þess að hann fór í upphafi til Grænlands og settist þar að
Galdrasafnið á Hólmavík hóf starfsemi sína árið 2000 og hefur síðan verið mjög vinsæll viðkomustaður ferðafólks. Galdrasafnið á því tuttugu ára afmæli um þessar mundir og Kristín Einarsdóttir ákvað af því tilefni að hitta framkvæmdastjórann Önnu Björg Þórarinsdóttur og fékk hana til að segja meðal annars frá því hvað kom til að safnið var sett á laggirnar á sínum tíma.
